E aña aki Aruba Excellence Foundation (A.E.F.) ta celebra 10 aña di existencia di e programa di certificacion Aruba Certification Program (A.C.P.).
Na Juli 2011 Ministerio di Turismo hunto cu A.T.A. a inicia cu un programa piloto di A.C.P. cu personanan di varios organisacion cu ta traha sea directamente of indirectamente cu turismo, brindando informacion corecto y conciso na nos bishitantenan na momento cu esakinan tin preguntanan di nos isla. E meta di e programa semper tabata y ainda ta, pa tur persona cu ta biba y traha na Aruba por brinda informacion corecto pero tambe por brinda servicio excelente cu Zjeito cu Aruba ta bon conoci pe. Desde October 2011 a cuminsa presenta A.C.P. semanalmente. Prome por medio di Enseñansa pa Empleo, despues via DOC Opleidingen y ultimo por medio di Pragmatic Advisory. Finalmente, na Juni 2018 A.T.A. a institui Aruba Excellence Foundation (A.E.F.) cu te dia di awe ta maneha y ehecuta e programa di certificacion.
A.E.F. no solamente ta maneha y ehecuta e programa di certificacion, pero tambe ta sigui desaroya esaki. Adicionalmente, A.E.F. ta desaroya otro typo di entrenamiento manera Service Excellence, Storytelling y Sustainable Leadership Program for Service Excellence.
Prome cu e pandemia di COVID-19, e programa di certificacion tabata wordo ofreci ‘face to face’ den grupo di por lo menos 20 participante. Mayoria biaha esaki tabata sosode ‘in house’, pues, na pia di trabou di e participante. Asina cu a bira cla cu pa motibo di COVID-19 y tur e retonan y restrictionnan cu esaki a bin cune, A.E.F. a haya su mes ta acelera e proceso inovativo di ofrece e programa di certificacion ‘online’ usando e plataforma di ‘Zoom’. Durante pandemia y te ainda, A.C.P. ta wordo facilita via ‘Zoom’.
Un reto cu a keda persisti, ta cu e participante ta mara na un schedule y orario cu ta wordo prescribe pa A.E.F. Pa acomoda tur hende cu kier haci e programa di certificacion ariba e dia y momento cu ta cumbini e participante mas, orguyosamente A.E.F. ta lansa un plataforma digital nobo pa tur hende participa cu e curso di A.C.P. ‘On Demand’, pues den nan mes un tempo. E participante mes ta scohe ki ora y na ki momento e ta pasa door di e A.C.P. E unico rekisito ta, cu e participante mester caba cu e programa den 6 siman. Despues di 6 siman, e participante su participacion ta caduca y lo mester start di nobo.
Contenido di A.C.P. On Demand
A.C.P. On Demand tambe ta consisti di e mesun seis topico:
A.C.P. 360ᴼ Virtual Island Tour, Aruba su Naturalesa y Hende, Aruba su Historia y Cultura, Aruba su Turismo, Servicio Excelente – E Bishitante y Servicio Excelente – E Bishitante y Ami. Cada un session ta alrededor di 40 minuut.
Na final di cada topico e participante lo ricibi acceso na e eBook di A.C.P. cu ta contene mas informacion detaya di e topico presenta. Pa e participante por pasa pa e siguiente session, e tin cu contesta algun pregunta di e presentacion cu el a wak. Ora cu e participante caba di mira tur e 6 presentacionnan, e ora e lo haci un ‘Final Exam’, pues lo mester contesta 35 pregunta di cual mester tin un minimo di 80% corectamente contesta, pa asina dibiaha ricibi su certificado. E participante ta keda oficialmente certifica como embahador di Aruba cu por duna informacion corecto y conciso di nos isla, y tambe cu e por brinda servicio excelente cu Zjeito. E certificado tin un valides di 4 aña.
Por registra pa participa cu A.C.P. on Demand via www.acp.aw
E participacion cu A.C.P. On Demand ta gratuito te cu December 2021. E participante mester start y caba prome cu 31 di December 2021 pa e participacion ta full gratuito. Desde Januari 2022 lo bolbe cuminsa cobra pa participacion na e programa di A.C.P.
Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.
